Seo o swanetšego go se tseba ka ga dipholisi tša poloko
Sebopego se bohlokwa sa THUŠO YA POLOKO/ PHOLISI YA NKGWETE ke gore pholisi e swanetšwe e NGWADIŠWE le khamphani ya inšorense ya lebaka le le telele yeo e ngwadišitšwego.
Se ke go netefatša gore leloko le tshephišwa mmako wo o lego molaong mo nakong ya lehu leo le inšorilwego.
MOSWARI WA PHOLISI / LELOKO o swanetše a fiwe SETIFIKEITI SA BOLOKO. Setifikeiti se se swanetše se laetše leina la mong wa inšorense; moputso wo o lefelwago; diputseletšo tšeo di lefelwago; mekgwatshepetšo ya go dira mmako le tshedimošo ye nngwe ye bohlokwa ya pholisi ya nkgwete. Pholisi ya nkgwete e swanetše e laetše gore khamphani ya poloko goba diagente tša yona ga tša thwalwa ke khamphani ya inšorense ka fao ga se tšona di saenilego ka tlase ga pholisi.
Go bohlokwa go baswari ba pholisi go tseba gore ba na le kgetho ya go tšea diputseletšo tša pholisi bjalo ka putseletšo ya tirelo ya poloko goba ka go lefelwa tšhelete ka matsogong.
Setifikeiti se swanetše se laetše tshedimošo ka moka yeo e hlokegago go Moswari wa pholisi / Leloko gore a tsebe dilo tša go swana le gore tšhireletšo e thoma neng; ke eng seo se šireletšwago le gore ke dife TŠEO DI SA ŠIRELETŠWAGO; nako ya go emela tšhireletšo, bj.bj.
Ditlhalošišo
THUŠO YA POLOKO / PHOLISI YA NKGWETE
E šupa tokumente ya molao yeo e filwego ke morekiši wa inšorense / mošireletši, yeo e nago le dintlha tša diputseletšo, ditefo, melao le maemo, gape e na le nomoro ya pholisi yeo e swanetšego gore e bontšhe mo godimo ga setifikeiti sa gago sa boloko.
MEKGATLO YA BOGWERA
Mokgatlo wa Bogwera ke instithušene ya ditšhelete yeo e bopšago ke sehlopha sa batho ba dinyakwa tše itšego, bao ba ntšhago tšhelete gomme ba e boloka mmogo go thušana ka tšhelete go dinyakwa tše itšego, mohlala, poloko. Putseletšo ya godimo e fihla ka R5 000.
Mokgatlo wa Bogwera ga se kgwebo yeo e dirago poelo, eupša poelo efe goba efe yeo e dirilwego ka dineo tša leloko leo le bolokago, e abja magareng ga maloko.
SETIFIKEITI SA BOLOKO
O swanetše o gapeletše go amogela setifikeiti seo se kgonthišišago gore o leloko. Setifikeiti se se swanetše se bontšhe dintlha ka moka tša pholisi ya gago.
Se se šupa khamphani yeo e dumeletšwego ke morekiši wa inšorense / mošireletši gore e eme legatong la yona go go rekišetša pholisi..
MOREKIŠI WA INŠORENSE / MOŠIRELETŠI
Khamphani ya inšorense ya lebaka le letelele yeo e ingwadišitšego le Boto ya Ditirelo tša Ditšhelete yeo e amogelago meputso gape e rwalago maikarabelo a go lefela diputseletšo mo nakong ya lehu.
MOSWARI WA PHOLISI / LELOKO
Se šupa wena o lego leloko leo le lefelago meputso ya diputseletšo tša batho bao o ba kgethilego ka gare ga pholisi.
MEPUTSO
Palomoka ya tšhelete yeo o e lefelago go mongwadi wa ka tlase go ya ka Pholisi ya Nkgwete.
MOEMEDI WA MOLAO
Ke motho wa go ikemela ka boyena yoo wena bjalo ka leloko o ka ikopanyago le yena ge e ba o sa kgotsofale ka phetolo yeo e tšwago go
Morekiši wa inšorense. Dintlha tša gagwe tšeo o ka ikopanyago le yena ka tšona di bontšhwa godimo ga tsebišo ya molao le ka morago ga pukwana ye.
Morekiši wa inšorense / mošireletši o tla laetša maemo goba malwetši ka gare ga pholisi ao e lego gore ge a ka tšwelela mo lehung la motho yo a šireleditšwego, ga go putseletšo yeo e tla lefšago.
Dipotšišo tšeo o hlokago gore o di botšiše le tshedimošo ye nngwe yeo o swanetšego gore o e amogele go tšwa go morekiši
P: Ke khamphani efe yeo o e emelago?
K: Bohlatse bo swanetše bo fiwe ke motho yoo a rekišago pholisi gomme bo swanetše bo be mo godimo ga foromo ya kgopelo le setifikeiti sa boloko seo se fiwago.
P: Nomoro ya Pholisi ke efe?
K: Se se swanetšwe se bontšhwe mo godimo ga foromo ya kgopelo le Setifikeiti sa Boloko.
P: Nka lokela mang ka gare ga pholisi?
K: Ke batho bao o ba kgethilego.
P: Ke lefela bokae?
K: Se ke palomoka ya tšhelete yeo o tlago go e lefela gape e akaretša ditefišo ka moka le tšhelete yeo o swanetšego gore o e lefele.
Ditefišo tše di swanetšwe di laetšwe gabotse.
P: Ke lefela ka kgwedi, kotara goba ka ngwaga?
K: O swanetše o nyakišiše gore o lefela neng.
P: Ke lefelela pele goba morago?
K: O swanetše gore o nyakišiše gore o lefela mathomong a kgwedi (pele) goba mafelelong a kgwedi goba go lefelela morago.
P: Ke swanetše ke lefe bjang?
K: Tšhelete ka letsogo goba go gogelwa pankeng
P: Ge ke lefela ka tšhelete ka letsogo ke hwetša rasiti?
K: Ee, e swanetše e be rasiti ya mmušo.
P: Meputso ye e ka oketšega mo nakong yeo e tlago?
K: Meputso e ka oketšega ge e ba go ba le batho ba bantši bao ba kgopelago tšhelete ya bona ka tlase ga pholisi ye.
P: Meputso e tiišetšwa lebaka le le kaakang?
K: Se se swanetšwe se bontšhwe godimo ga Pholisi ya Nkgwete.
P: Tšhireletšo ya ka e thoma neng?
K: Go ka ba le dinako tša go leta ka gare ga Pholisi ya Nkgwete.
P: Dinako tša go leta ke dife?
K Tše di tla tšwelela ka gare ga melao le maemo a Pholisi ya Nkgwete.
P: Go direga eng ge eba lehu le hlaga ka kotsi?
K: Gantši dinako tša go leta ga di dirišwe mo mabakeng a mabjalo.
K: Tše di tla tšwelela ka gare ga melao le maemo a Pholisi ya Nkgwete.
P: Go direga eng ge nka hlolega go lefa goba ka emiša go lefa?
K: O ka se sa šireletšwa gomme ge o thoma go lefa gape, dinako tša go leta le dikgethollwa di tla dirišwa gape.
P: Tšhireletšo e fela neng go motho yo mongwe le yo mongwe?
K: O swanetše o fiwe dintlha ka botlalo, kudu tša bana.
P: Ke hwetša bohlatse bja boloko?
K: O swanetše o hwetše Setifikeiti sa Boloko le kakaretšo ya go ba le dintlha ka moka tša batho bao ba šireletšwago, tšhelete yeo o swanetšego gore o e lefe, le dinako ka moka tša go leta le dikgethollwa.
P: Nka kgona go oketša tšhireletšo ya ka ka morago?
K: Ee, o ka oketša diputseletšo godimo ga pholisi ya gago ge eba Pholisi ya Nkgwete e a go dumelela, nako efe goba efe; se se tla oketša gape le meputso ya gago yeo o e lefago. Dikgethollwa le dinako tša go leta di ka dirišwa godimo ga putseletšo yeo e okeditšwego.
P: Ke hwetša bjang diputseletšo tša ka ka nako ya lehu?
A: Mekgwatshepetšo ya go hwetša diputseletšo tša gago o swanetše o e fiwe ka botlalo ka gare ga melao le maemo.
P: Nka bona Pholisi ya Nkgwete?
K: O na le toka ya go bona Pholisi ya Nkgwete. Se se dirwa ge o ikwa o sa kgotsofale ka dikarabo tšeo o di fiwago goba o na le kgonono ka motho yoo a go rekišetšago pholisi. Pholisi ya Nkgwete e swanetše e be gona kantorong ya kgauswi le wena ya ditirelo tša batho.
P: Nka phumula pholisi ya ka?
K: O ka phumula pholisi ya gago mo matšatšing a 30 ao o lefetšego moputso wa gago ka ona gomme wa boelwa ke tšhelete ya gago ka moka ge eba ga sa ka wa hwetša tšhelete ya gago ka nako ka lebaka la lehu. Ka morago ga moo pholisi e ka phumulwa nako efe goba efe, eupša o ka se hwetše tefelo ya meputso ya gago.
P: Go direga eng ge pholisi ka moka e šuthišetšwa go morekiši / mošireletši wo mongwe?
K: Se se ka dirwa, eupša o swanetše o tsebišwe gape o sedimošwe gore e ama bjang batho bao ba bego ba šireleditšwe peleng, go ya ka dilo ka moka tšeo di boletšwego ka godimo. O swanetše o fiwe setifikeiti se seswa sa boloko ke Morekiši / Mošireletši. Ge o belaela o kare ga o mo maemong ao a lekanego goba a makaone, o swanetše o ikopanye le Morekiši / Mošireletši wa gona bjale ka pela ka moo go ka kgonegago.
P: Go direga eng ge o na le pelaelo goba potšišo?
K: Wena goba baputseletšwa ba gago le swanetše le lebiše dipelaelo tša lena go Morekiši / Mošireletši pele. Ge e ba o sa kgotsofale, o ka bega pelaelo ya gago go Moemedi wa molao wa Inšorense ya Lebaka le le Telele goba go Boto ya Ditirelo tša Ditšhelete (FSB).
Ela Hloko: Dintlha tša Moemedi wa molao le FSB di swanetše di be gona godimo ga Setifikeiti sa Boloko gape di ka morago ga pukwana ye ya tshedimošo. 6
